0
0
ചെന്നൈ : ഏകദേശം മൂന്ന് വർഷത്തെ ഇടവേളയ്ക്ക് ശേഷം ചെന്നൈയിൽ പുതിയ ലോ ഫ്ലോർ ബസുകളുടെ ആദ്യ ബാച്ച് ലഭിക്കുമെന്ന് റിപ്പോർട്ടുകൾ.
പുതിയ 552 വാഹനങ്ങൾ വാങ്ങാൻ സംഭരണ ഓർഡറുകൾ നൽകിയിട്ടുണ്ടെന്നും അതിൽ 352 എണ്ണം ചെന്നൈയിലെ മെട്രോപൊളിറ്റൻ ട്രാൻസ്‌പോർട്ട് കോർപ്പറേഷനായി (എംടിസി) നീക്കിവെക്കുമെന്നും ഗതാഗത മന്ത്രി എസ് എസ് ശിവശങ്കർ അറിയിച്ചു.
ജർമ്മൻ ബാങ്കിന്റെ (കെഎഫ്ഡബ്ല്യു) സാമ്പത്തിക സഹായം ഉപയോഗിച്ച് വാങ്ങുന്ന ശേഷിക്കുന്ന 200 ബസുകൾ മധുരയിലും കോയമ്പത്തൂരിലും സർവീസ് നടത്തും.
500.9 കോടി ചെലവ് പ്രതീക്ഷിക്കുന്ന ഈ ലോ ഫ്ലോർ ബസുകൾ എല്ലാ യാത്രക്കാർക്കും, പ്രത്യേകിച്ച് ഭിന്നശേഷിക്കാർക്കും മുതിർന്ന പൗരന്മാർക്കും കുട്ടികൾക്കും എളുപ്പത്തിൽ പ്രവേശനം ഉറപ്പാക്കുമെന്നും മന്ത്രി ശിവശങ്കർ പറഞ്ഞു.
442 ലോ ഫ്ലോർ ബസുകളും 1,107 സ്റ്റാൻഡേർഡ് ബസുകളും വാങ്ങാനായിരുന്നു സർക്കാർ ആദ്യം പദ്ധതിയിട്ടിരുന്നത്.
എന്നാൽ ഇതിനെതിരെ വികലാംഗ അവകാശ പ്രവർത്തകർ മദ്രാസ് ഹൈക്കോടതിയിൽ കേസ് ഫയൽ ചെയ്തു.
എല്ലാ പുതിയ ബസുകളും ലോ-ഫ്ലോർ ആയിരിക്കണമെന്നും ഏവർക്കും ആക്സസ് ചെയ്യാവുന്നതായിരിക്കണമെന്നും അവർ ഹർജിയിൽ ആവശ്യം ഉന്നയിച്ചു.
എന്നാൽ മഴക്കാലത്ത് താഴ്ന്ന പ്രദേശങ്ങളിലോ സബ്‌വേകളിലോ സർവീസ് നടത്താനുള്ള ബുദ്ധിമുട്ടും ചെലവ് കൂടിയതിനാലും ലോ ഫ്‌ളോർ ബസുകൾ മാത്രം സാധ്യമല്ലെന്ന് സർക്കാർ മറുപടിയായി അറിയിച്ചു.
ഇതോടെ ലോ ഫ്ലോർ ബസുകളുടെ എണ്ണം 25% വർധിപ്പിക്കാൻ കോടതി സർക്കാരിനോട് നിർദേശിച്ചു.
തുടർന്ന് 442 ബസുകൾക്ക് പകരം 552 ബസുകൾ വാങ്ങാൻ ഉത്തരവാകുകയായിരുന്നു.
