0
0
ചെന്നൈ: പ്രളയക്കെടുതിയിൽ നിന്ന് തിരുനെൽവേലി, തെങ്കാശി ജില്ലകൾ പതുക്കെ കരകയറുന്നു. മഴ മാറി താമിരപരണിയിൽ വെള്ളക്കെട്ട് കുറഞ്ഞ് തുടങ്ങിയതോടെ സാധാരണ നിലയിലേക്ക് മടങ്ങുകയാണ് ഇവിടുത്തെ ആളുകൾ.
തിരുനെൽവേലി, തെങ്കാശി ജില്ലകളിൽ മഴ ഒരുപരിധിവരെ കുറഞ്ഞതും താമിരപരണിയിൽ കവിഞ്ഞൊഴുകിയ വെള്ളക്കെട്ട് ഇറങ്ങിത്തുടങ്ങിയതും പൊതുജനങ്ങൾക്ക് ആശ്വാസമായിരിക്കുകയാണ്. തിരുനെൽവേലി കൊക്രാക്കുളത്ത് കഴിഞ്ഞ ദിവസം പുഴ പാലം നിറഞ്ഞൊഴുകിയ ജലനിരപ്പ് ഇന്നലെ കുറഞ്ഞു. പുഴയോര പ്രദേശങ്ങളിലെ വീടുകളിൽ വെള്ളക്കെട്ട് വലിയതോതിൽ കുറഞ്ഞിട്ടുണ്ട്.
ഒറ്റപ്പെട്ടുപോയവരെ രക്ഷിക്കാനുള്ള പ്രവർത്തനങ്ങൾക്കായി തിരുനെൽവേലി, കന്യാകുമാരി ജില്ലകളിലെ തീരദേശ ഗ്രാമങ്ങളിൽ നിന്ന് നാടൻ വള്ളങ്ങളുമായി എത്തിയ മത്സ്യത്തൊഴിലാളികൾ ഇന്നലെ സ്വന്തം സ്ഥലങ്ങളിലേക്ക് മടങ്ങി. രക്ഷാപ്രവർത്തനത്തിൽ ഏർപ്പെട്ടിരുന്ന ബോട്ടുകൾ ട്രക്കുകളിൽ കയറ്റി കൊണ്ടുപോയി. തിരുനെൽവേലി ജംക്‌ഷൻ റെയിൽവേ സ്‌റ്റേഷനിൽ ട്രാക്ക് മുക്കിയ വെള്ളപ്പൊക്കവും കുറഞ്ഞുവരികയാണ്.
ഇവിടെ കുളം പോലെ അടിഞ്ഞുകൂടിയ വെള്ളം മോട്ടോർ ഉപയോഗിച്ച് പമ്പ് ചെയ്യുന്ന ജോലിയിലാണ് തൊഴിലാളികൾ ഇപ്പോൾ. തിരുനെൽവേലി നഗരത്തിൽ പലയിടത്തും കേടായ ഇരുചക്രവാഹനങ്ങൾ നന്നാക്കാൻ ഇരുചക്രവാഹനങ്ങൾ വർക്‌ഷോപ്പുകളിൽ എത്തിച്ചു. ഇതുമൂലം ഇരുചക്രവാഹനങ്ങൾ നന്നാക്കുന്ന തിരക്കിലാണ് മെക്കാനിക്കുകൾ പലയിടത്തും.
തിരുനെൽവേലി ടൗണിലെ പ്രധാന തെരുവും ചുറ്റുമുള്ള തെരുവുകളും പൂർണമായി വെള്ളം വിട്ടട്ടില്ല. ഇതേത്തുടർന്ന് ദുരന്തനിവാരണ സേന ഈ പ്രദേശത്ത് രക്ഷാപ്രവർത്തനം നടത്തിവരികയാണ്. പാളയംഗോട്ടൈ മാർക്കറ്റ്, തിരു നൽവേലി ടൗൺ മാർക്കറ്റ്, നൈനാർകുളം മാർക്കറ്റ് എന്നിവ ഇന്നലെ പതിവുപോലെ പ്രവർത്തിച്ചു തുടങ്ങി. ആളുകൾ കടകളിൽ എത്തി പഴക്കറികൾ വാങ്ങി.
പലയിടത്തും റോഡ് പൊളിഞ്ഞുകിടക്കുന്നത് മൂലം ഗതാഗതം സ്തംഭിച്ചതിനാൽ പുറം ജില്ലകളിൽ നിന്ന് പഴവും കറിയും കൊണ്ടുവരാൻ പറ്റാത്ത സ്ഥിതിയാണ്. പച്ചക്കറി ലഭ്യത കുറഞ്ഞതോടെ വില പലമടങ്ങ് വർധിച്ചതായി വ്യാപാരികൾ പറഞ്ഞു. തിരുനഗറിലെ കർഷക വിപണി ഇന്നലെ പതിവുപോലെ പ്രവർത്തിച്ചു.
