Day: 30 July 2024

ചെന്നൈ: ഡിഎംകെയുടെ നേതൃത്വത്തിലുള്ള സർക്കാരിന് കീഴിൽ ഒരു ദിവസം 3 രാഷ്ട്രീയ നേതാക്കൾ വെട്ടേറ്റുമരിച്ചത് അത്യന്തം ഞെട്ടിക്കുന്നതും വേദനാജനകവുമെന്ന് ശശികല. തമിഴ്നാട്ടിൽ ക്രമസമാധാനം തകരുന്നുവെന്ന് അഭിമുഖങ്ങളിലൂടെയും റിപ്പോർട്ടുകളിലൂടെയും ഞാൻ നിരന്തരം സർക്കാരിനെ ചൂണ്ടിക്കാണിക്കുന്നു. ഇപ്പോൾ അതിനെ ന്യായീകരിക്കാൻ രാഷ്‌ട്രീയ വ്യക്തികളെ വെട്ടിക്കൊന്നുകൊണ്ടിരിക്കുന്നുവെന്നും ശശികല പുറത്തിറക്കിയ പ്രസ്താവനയിൽ പറഞ്ഞു:- ഇതെല്ലാം തടയാനുള്ള മുൻകരുതൽ നടപടികളൊന്നും സ്വീകരിക്കാതെ ദിനംപ്രതി നടക്കുന്ന കൂട്ടക്കൊല തടയുന്നതിൽ ഡിഎംകെ പരാജയപ്പെട്ടതായും സർക്കാരിനെ ഞാൻ ശക്തമായി അപലപിക്കുന്നുവെന്നും ശശികല കൂട്ടിച്ചേർത്തു.

ചെന്നൈ : വിവാഹമോചനം ആവശ്യപ്പെട്ട ഭാര്യയെ ഇസ്തിരിപ്പെട്ടിവെച്ചു പൊള്ളലേൽപ്പിച്ചു കടന്നുകളഞ്ഞ യുവാവിനെ തേടി ചെന്നൈ സിറ്റി പോലീസ്. ചെന്നൈ പുരുഷവാക്കത്ത് താമസിക്കുന്ന ഹാലിദാണ് ഭാര്യ നസിയയെ പൊള്ളലേൽപ്പിച്ചത്. രാത്രിയിൽ ഉറങ്ങുന്നതിനിടെയാണ് നസിയയുടെ ശരീരത്തിൽ ചൂടാക്കിയ തേപ്പുപെട്ടി വെച്ചത്. സംഭവത്തിനുശേഷം ഒളിവിൽപ്പോയ ഇയാളുടെപേരിൽ കേസെടുത്ത പോലീസ് തിരച്ചിൽ ഊർജിതപ്പെടുത്തി. സ്വകാര്യസ്ഥാപനത്തിൽ ജീവനക്കാരായ ഹാലിദും നസിയയും ആറുവർഷം മുൻപാണ് പ്രണയിച്ചു വിവാഹിതരായത്. എന്നാൽ, ഹാലിദ് ലഹരിക്കടിമയായതോടെ ഇരുവരും തമ്മിൽ വഴക്കുണ്ടാകുന്നത് പതിവായി. ഇതോടെയാണ് നസിയ വിവാഹമോചനം ആവശ്യപ്പെട്ടത്. പിന്നീട് കഴിഞ്ഞദിവസം നസിയ ഉറങ്ങിക്കിടക്കുമ്പോൾ പൊള്ളലേൽപ്പിക്കുകയായിരുന്നെന്ന് പോലീസ് പറഞ്ഞു.