0
0
ജാതി അതിക്രമങ്ങൾക്ക് ഇരയായ തമിഴ്‌നാട്ടിലെ തിരുനെൽവേലി ജില്ലയിൽ നിന്നുള്ള ദളിത് വിദ്യാർത്ഥികൾക്ക് ആദരം.
പ്രതികൂല സാഹചര്യങ്ങൾക്കിടയിലും നേട്ടങ്ങൾ കൈവരിച്ച ചിന്നദുരൈയെയും നിവേതയെയും തമിഴ്‌നാട് മുഖ്യമന്ത്രി എംകെ സ്റ്റാലിൻ അഭിനന്ദിച്ചു.
ചിന്നദുരൈ +2 പൊതു പരീക്ഷകളിൽ 78 ശതമാനം മാർക്ക് നേടിയപ്പോൾ ട്രാൻസ്ജെൻഡർ എ നിവേത 47.1 ശതമാനം മാർക്ക് നേടി.
“മുഖ്യമന്ത്രി എന്നെ അഭിനന്ദിക്കുകയും ഉന്നത പഠനത്തിന് എല്ലാ സഹായവും വാഗ്ദാനം ചെയ്തു. ഭാവി പരിപാടികളെ കുറിച്ച് അദ്ദേഹം എന്നോട് ചോദിച്ചു. തിരുനെൽവേലിയിലെ ഒരു കോളേജിൽ ബി.കോം പഠിക്കാൻ ആഗ്രഹിക്കുന്നുവെന്ന് ഞാൻ അദ്ദേഹത്തോട് പറഞ്ഞു. അതിനെ തുടർന്ന്, എനിക്ക് ഒരു ഓഡിറ്ററാകാൻ സിഎ എടുക്കണം. എൻ്റെ മാർക്കിൽ എൻ്റെ കുടുംബാംഗങ്ങളും സന്തുഷ്ടരാണ്,” ചിന്നദുരൈ ചൊവ്വാഴ്ച മാധ്യമപ്രവർത്തകരോട് പറഞ്ഞു.
17 കാരനായ ചിന്നദുരൈ, 2023 ഓഗസ്റ്റിൽ ഒരു പ്രബല ജാതിയിൽ നിന്നുള്ള മൂന്ന് സഹപാഠികളുടെ ക്രൂരമായ ആക്രമണം നേരിട്ടിരുന്നു. തുടർന്ന് ചിന്നദുരൈയെ ആശുപത്രിയിൽ പ്രവേശിപ്പിച്ചു. ആക്രമണത്തിൽ സാരമായ പരിക്കുകളേറ്റതോടെ കൈയിലും വിരലുകളിലും ശസ്ത്രക്രിയ ആവശ്യമായി വന്നു.
ചിന്നദുരൈ തൻ്റെ വിദ്യാഭ്യാസം ഉറപ്പാക്കുന്നതിനായി തിരുനെൽവേലി ജില്ലാ കളക്ടർ സ്‌കൂൾ മാറ്റുന്നതിന് ആവശ്യമായ സൗകര്യങ്ങൾഒരുക്കി. വെല്ലുവിളികൾക്കിടയിലും, ക്രൂരമായ ആക്രമണത്തിൽ തനിക്കുണ്ടായ മുറിവുകൾ പൂർണ്ണമായും ഉണങ്ങാത്തതിനാൽ, മറ്റൊരാളുടെ സഹായത്തോടെയാണ് ചിന്നദുരൈ പരീക്ഷ എഴുതിയത്.
ട്രാൻസ്ജെൻഡർ വ്യക്തിത്വത്തിൻ്റെ പേരിൽ വീട്ടുകാരിൽ നിന്നുള്ള തിരസ്‌കരണമായിരുന്നു നിവേതയുടെ യാത്ര. 14-ാം വയസ്സിൽ വീടുവിട്ടിറങ്ങിയ അവൾ മറ്റ് ട്രാൻസ്‌ജെൻഡർമാരുടെ പിന്തുണ കണ്ടെത്തി അവളുടെ വിദ്യാഭ്യാസം തുടർന്നു. 12 ബോർഡ് പരീക്ഷകളിൽ 600ൽ 283 മാർക്കാണ് അവൾ നേടിയത്. പാർശ്വവൽക്കരിക്കപ്പെട്ട, ട്രാൻസ്ജെൻഡർ സമൂഹത്തെ സേവിക്കുന്നതിനായി നീറ്റ് പരീക്ഷയിൽ വിജയിച്ച് ഡോക്ടറാകാൻ നിവേത ആഗ്രഹിക്കുന്നു.
