Day: 25 May 2024

ചെന്നൈ : പൂനമല്ലിയിൽ ഹിന്ദു മറുമലർച്ചി മുന്നേറ്റ മുന്നണി സംസ്ഥാനാധ്യക്ഷൻ രാജാജിയെ വെട്ടിക്കൊലപ്പെടുത്തിയ കേസിൽ കോൺഗ്രസ് പ്രവർത്തകനടക്കം ആറുപേരെ പൂനമല്ലി പോലീസ് അറസ്റ്റുചെയ്തു. മാങ്ങാട് ആമ്പൽ നഗർ സ്വദേശിയായ രാജാജി(45)യെ ബുധനാഴ്ച ചായക്കടയിലിരിക്കേ അജ്ഞാതസംഘം വളഞ്ഞ് വെട്ടിക്കൊലപ്പെടുത്തുകയായിരുന്നു. കോൺഗ്രസ് പ്രവർത്തകൻ ഗോപാലിന്റെ ഭാര്യയുമായി രാജാജിക്ക്‌ ബന്ധമുണ്ടായിരുന്നെന്ന് പ്രതികൾ ചോദ്യംചെയ്യലിൽ വെളിപ്പെടുത്തി.

ചെന്നൈ : കാലവർഷം ആരംഭിക്കാനിരിക്കെ, നഗരത്തിൽ വെള്ളക്കെട്ട് ഒഴിവാക്കാനായി ജലാശയങ്ങളിലെയും കനാലുകളിലെയും ഓടകളിലെയും മാലിന്യങ്ങൾ നീക്കംചെയ്യാനുള്ള നടപടികൾ ആരംഭിച്ചു. കോർപ്പറേഷന്റെ നേതൃത്വത്തിലാണ് മാലിന്യങ്ങൾ നീക്കംചെയ്യുക. ചെന്നൈ കോർപ്പറേഷന്റെ 15 സോണുകൾക്കും 50 ലക്ഷം രൂപ വിതരണംചെയ്തതായി അധികൃതർ അറിയിച്ചു. മുൻവർഷങ്ങളിൽ വെള്ളക്കെട്ടുണ്ടായ പ്രദേശങ്ങളിലെ ജലാശയങ്ങളും കനാലുകളും ഓടകളും ശുചീകരിക്കും.

ചെന്നൈ : മുല്ലപ്പെരിയാറിൽ പുതിയ അണക്കെട്ട്‌ നിർമിക്കാനുള്ള കേരളത്തിന്റെ നീക്കത്തിനെതിരേ തമിഴ്‌നാട് സർക്കാരും ഭരണ, പ്രതിപക്ഷ കക്ഷികളും രംഗത്തുവന്നിട്ടുണ്ട്. മുല്ലപ്പെരിയാറിൽ നിലവിലുള്ള അണക്കെട്ട് പൊളിച്ച് പുതിയ അണകെട്ടുന്നതിനുള്ള വിശദപദ്ധതിരേഖ (ഡി.പി.ആർ.) ഒരു മാസത്തിനകം പൂർത്തിയാക്കാൻ കേരളം തീരുമാനിച്ചതാണ് തമിഴ്‌നാടിനെ പ്രകോപിപ്പിച്ചത്. പുതിയ അണക്കെട്ട്‌ നിർമിക്കണമെന്ന കേരളത്തിന്റെ ആവശ്യം മേയ് 28-നു ചേരുന്ന വിദഗ്ധസമിതി ചർച്ചയ്ക്കെടുക്കരുതെന്ന് തമിഴ്‌നാട്, കേന്ദ്ര പരിസ്ഥിതിമന്ത്രാലയത്തോട് ആവശ്യപ്പെട്ടു. രണ്ടുസംസ്ഥാനങ്ങളും യോജിപ്പിലെത്തിയാൽമാത്രമേ മുല്ലപ്പെരിയാറിൽ പുതിയ അണക്കെട്ട് നിർമിക്കാൻപറ്റൂവെന്ന് സുപ്രീംകോടതി വ്യക്തമാക്കിയിട്ടുള്ളതാണെന്നും കേരളത്തിന്റെ പുതിയനീക്കം സുപ്രീംകോടതിവിധിക്ക്‌ എതിരാണെന്നുമാണ് പരിസ്ഥിതിമന്ത്രാലയത്തിനുള്ള കത്തിൽ തമിഴ്‌നാട് പറയുന്നത്. കേരളത്തിന്റെ…

ചെന്നൈ : വൈദ്യുതി ഷോർട്ട് സർക്യൂട്ടിനെത്തുടർന്ന് ചെന്നൈ അന്താരാഷ്ട്ര വിമാനത്താവളത്തിൽ തീപ്പിടിത്തം. എയർ ട്രാഫിക് കൺട്രോൾ(എ.ടി.സി.) ബ്ലോക്കിന്റെ നാലാം നിലയിലാണ് വ്യാഴാഴ്ച പുലർച്ചെ 3.30-ഓടെ തീപ്പിടിത്തമുണ്ടായത്. ഉടൻതന്നെ തീയണയ്ക്കാൻ സാധിച്ചതിനാൽ വൻഅപകടം ഒഴിവായി. പഴയ സാധനങ്ങൾ സൂക്ഷിച്ചിരുന്ന മുറിയിലാണ് തീപ്പിടിത്തമുണ്ടായത്. വിമാനത്താവളത്തിലെ അഗ്നിരക്ഷാസംവിധാനങ്ങൾ ഉപയോഗിച്ചുതന്നെ തീയണച്ചു. പിന്നീട് ഗിണ്ടി, അശോക്‌നഗർ എന്നിവിടങ്ങളിൽനിന്ന് അഗ്നിരക്ഷാസേനയെത്തി സുരക്ഷയുറപ്പാക്കി. കാര്യമായ നാശനഷ്ടമുണ്ടായില്ലെന്ന് വിമാനത്താവളം അധികൃതർ അറിയിച്ചു. വിമാനത്താവളത്തിന്റെ പ്രവർത്തനത്തെയും ബാധിച്ചില്ല. സംഭവത്തിൽ വിമാനത്താവള അതോറിറ്റി അന്വേഷണം ആരംഭിച്ചു.

ചെന്നൈ : തമിഴ് കവി തിരുവള്ളുവരെ വീണ്ടും കാവി പുതപ്പിച്ചുകൊണ്ട് ഗവർണർ ആർ.എൻ. രവി പുറത്തിറക്കിയ ക്ഷണക്കത്തിനെച്ചൊല്ലി വിവാദം പുകയുന്നു. വെള്ളിയാഴ്ച രാജ്ഭവനിൽ സംഘടിപ്പിച്ച തിരുവള്ളുവർ തിരുവിഴ ആഘോഷ ചടങ്ങിനുവേണ്ടി തയ്യാറാക്കിയ ക്ഷണക്കത്തിലാണ് തിരുവള്ളുവരെ കാവിവസ്ത്രം ധരിപ്പിച്ചും ഭസ്മം പൂശിയും ചിത്രീകരിച്ചത്. ഇതിൽ പ്രതിഷേധവുമായി ഭരണകക്ഷിയായ ഡി.എം.കെ.യും കോൺഗ്രസും ഉൾപ്പെടെ പാർട്ടികൾ രംഗത്തെത്തി. തിരുവള്ളുവരെ കാവി പുതപ്പിച്ചതിലൂടെ ലോകമെമ്പാടുമുള്ള തമിഴരെ ഗവർണർ അപമാനിച്ചിരിക്കുകയാണെന്ന് ഡി.എം.കെ. വക്താവ് ടി.കെ.എസ്. ഇളങ്കോവൻ ആരോപിച്ചു. തമിഴ് ഭാഷയെയും സംസ്കാരത്തെയുമൊക്കെ ഇതിലൂടെ അവഹേളിച്ചിരിക്കുകയാണ്. നടപടിക്കെതിരേ ശക്തമായി പ്രതിഷേധിക്കുന്നു -ഇളങ്കോവൻ പറഞ്ഞു.…

ചെന്നൈ : മധ്യവേനലവധിക്കുശേഷം തമിഴ്നാട്ടിൽ സ്കൂളുകൾ ജൂൺ ആറിനു തുറക്കും. വെള്ളിയാഴ്ച വിദ്യാഭ്യാസവകുപ്പ് ഡയറക്ടറാണ് ഇക്കാര്യമറിയിച്ചത്. സർക്കാർ, എയ്ഡഡ് സ്കൂളുകളിൽ ഒന്നുമുതൽ പ്ലസ്ടുവരെ ക്ലാസുകളാണ് ആറുമുതൽ തുടങ്ങുക. ഇതിനുള്ള എല്ലാ ഒരുക്കങ്ങളും നടത്താൻ വിദ്യാഭ്യാസ ഓഫീസർമാർക്കും നിർദേശം നൽകിയിട്ടുണ്ട്. അതേസമയം, സി.ബി.എസ്.ഇ. ബോർഡിനുകീഴിൽ സ്കൂളുകൾ എന്നുതുറക്കുമെന്നകാര്യം ഇനിയും അറിയിച്ചിട്ടില്ല.