Day: 17 August 2024

പുതുച്ചേരി : സ്വതന്ത്ര്യ സംസ്ഥാനപദവി നൽകണമെന്ന് ആവശ്യപ്പെട്ട് പുതുച്ചേരി നിയമസഭയിൽ പ്രമേയം പാസാക്കി. ബജറ്റ് സമ്മേളനത്തിന്റെ അവസാനദിവസമായ ബുധനാഴ്ച ഡി.എം.കെ. എം.എൽ.എ.മാരായ ആർ.ശിവ, എ.എം.എച്ച്. നസീം, ആർ. സെന്തിൽ കുമാർ, സ്വതന്ത്ര എം.എൽ.എ. നിയമസഭാംഗമായ നെഹ്റു എന്നിവർ സ്വകാര്യ പ്രമേയം അവതരിപ്പിക്കുകയായിരുന്നു. എന്നാൽ ഇതിനെ സർക്കാർ പ്രമേയമായി പരിഗണിക്കാൻ മുഖ്യമന്ത്രി എൻ.രംഗസാമി ആവശ്യപ്പെടുകയും സ്പീക്കർ അതിന് തയ്യാറാകുകയും ചെയ്തു. ചർച്ചകൾക്ക് ശേഷം പ്രമേയം ഐകകണ്ഠ്യേന പാസാക്കി. പുതുച്ചേരിക്ക്‌ സംസ്ഥാന പദവി നൽകാൻ കേന്ദ്രം തയ്യാറാകണമെന്ന് മുഖ്യമന്ത്രി പ്രമേയത്തെ പിന്തുണച്ചു നടത്തിയ പ്രസംഗത്തിൽ ആവശ്യപ്പെട്ടു.

ചെന്നൈ : നാഗപട്ടണത്തിനും ശ്രീലങ്കയിലെ കാങ്കേശൻതുറയ്ക്കും ഇടയിലൂടെ കപ്പൽ സർവീസ് തുടങ്ങി. വെള്ളിയാഴ്ച രാവിലെ പുതുച്ചേരി മന്ത്രി നമശിവായം, നാഗപട്ടണം ജില്ലാ കളക്ടർ ആകാശ്, സെൽവരാജ് എം.പി. എന്നിവർ പച്ചക്കൊടിവീശി. 44 യാത്രക്കാരുമായി പുറപ്പെട്ട കപ്പൽ ഉച്ചയ്ക്ക് രണ്ടിന് കാങ്കേശൻതുറയിലെത്തി. ശനിയാഴ്ച രാവിലെ പത്തിന് കാങ്കേശൻതുറയിൽനിന്ന് പുറപ്പെട്ട് ഉച്ചയ്ക്ക് രണ്ടിന് നാഗപട്ടണത്തെത്തും. അന്തമാനിൽനിന്നുള്ള ‘ശിവഗംഗ’ എന്ന കപ്പലാണ് സർവീസ് നടത്തുന്നത്. സാധാരണക്ലാസിൽ 123 സീറ്റും പ്രീമിയം ക്ലാസിൽ 27 സീറ്റും ഉൾപ്പെടെ 150 സീറ്റുകളുണ്ട്. വെള്ളം, ഭക്ഷണം, അത്യാവശ്യ മരുന്നുകൾ എന്നിവ നൽകും. നാഗപട്ടണത്തുനിന്ന്…

ചെന്നൈ : ചെന്നൈയിലെ കോർപ്പറേഷൻ സ്കൂളുകളിൽ പഠിക്കുന്ന 3500 വിദ്യാർഥികൾക്ക് സവീത ഡെന്റൽ കോളേജും എം.കെ. മോഹൻ ചാരിറ്റബിൾ ട്രസ്റ്റ് മെഡിക്കൽ വിഭാഗവും ദന്തപരിശോധന നടത്തി. ക്യാമ്പിനൊപ്പം ദന്തശുചീകരണത്തിന്റെ പ്രാധാന്യത്തെപ്പറ്റി ബോധവത്ക്കരണ പരിപാടിയും നടത്തി. സവീത ഡെന്റൽ കോളേജിലെ ഡോ. എം. ബിപിൻ ഏകോപിപ്പിച്ച ക്യാമ്പ് പന്ത്രണ്ട് സ്കൂളുകൾ പിന്നിട്ട് ഷേണായി നഗറിലുള്ള തിരുവികാ സ്കൂളിൽ സമാപിച്ചു. ഡെപ്യൂട്ടി പോലീസ് കമ്മിഷണർ പ്രവീൺ കുമാർ മുഖ്യാതിഥിയായി.

ചെന്നൈ : പുതുക്കോട്ട ജില്ലയിൽ ഭ്രൂണഹത്യയെത്തുടർന്ന് യുവതി മരിച്ചു. കറമ്പക്കുടി തീത്തൻവിടുത്തി സ്വദേശി പരിമളേശ്വരന്റെ ഭാര്യ കലൈമണി(31)യാണ് മരിച്ചത്. ഗർഭിണിയായ കലൈമണി സ്വകാര്യ ആശുപത്രിയിൽ പരിശോധന നടത്തിയപ്പോൾ ഗർഭസ്ഥശിശു പെണ്ണാണെന്നു വിവരം ലഭിച്ചു. നേരത്തേ ഇവർക്ക് രണ്ടു പെൺകുട്ടികളുള്ളതിനാൽ മൂന്നാമത്തേത്‌ വേണ്ടെന്നു തീരുമാനിച്ച് അഞ്ചുമാസമുള്ള ഭ്രൂണം നീക്കംചെയ്യാൻ ഡോക്ടർമാരോട് ആവശ്യപ്പെട്ടു. ഡോക്ടർമാർ വിസമ്മതിച്ചെങ്കിലും കലൈമണിയും കുടുംബാംഗങ്ങളും നിർബന്ധിച്ചു. തുടർന്ന് രക്തസ്രാവംമൂലമാണ് കലൈമണി മരിച്ചത്. ഡോക്ടർമാർക്കെതിരേ നടപടിയാവശ്യപ്പെട്ട് ബന്ധുക്കൾ ആശുപത്രിയുടെ മുന്നിൽ പ്രതിഷേധിച്ചു. പോലീസെത്തി അനുനയിപ്പിച്ചാണ് ഇവരെ തിരിച്ചയച്ചത്.